Buddsoddiad mawr ar gyfer ymchwil iechyd merched
Bydd canolfan ymchwil bwrpasol ar gyfer iechyd merched yn agor fis Ebrill eleni, a’r nod yw y bydd hi’n darparu tystiolaeth hanfodol a fydd yn gwella gofal iechyd i ferched yng Nghymru a thu hwnt.
Bydd Canolfan Ymchwil Iechyd Merched Cymru yn elwa ar fuddsoddiad o £3 miliwn gan Ymchwil Iechyd a Gofal Cymru sy’n cael cefnogaeth gan Lywodraeth Cymru, ynghyd â £750,000 ychwanegol ar gyfer projectau ymchwil eraill sy’n canolbwyntio ar iechyd merched.
Mae’r Athro Jane Noyes a Dr Carys Stringer, ymchwilwyr o Brifysgol Bangor wedi chwarae rhan uniongyrchol yn y gwaith o ddatblygu'r Ganolfan, a bydd Dr Stringer, sy’n ddarlithydd gyda'r Academi Tegwch Iechyd, Iechyd Ataliol a Llesiant, yn rhoi ei harbenigedd ym maes gwerthuso economeg iechyd ar waith.
Bydd y ganolfan hon yn ganolbwynt byd-eang ar gyfer ymchwilio, arloesi a chydgynhyrchu ym maes iechyd merched. Bydd yn mynd i’r afael ag anghydraddoldebau hirsefydlog ym maes iechyd merched ac yn ceisio cael gwared ar yr anghydraddoldeau hynny. Bydd yn rhoi sylw penodol i bedwar maes thematig sef:
1. Iechyd Atalaliol a Thrawsnewidiadau Iach - Hyrwyddo mesurau ataliol a chefnogi trawsnewidiadau iach trwy gydol oes.
2. Cyflyrau Cynnar a Gydol Oes - Gwella diagnosis, triniaeth a gofal ar gyfer cyflyrau sy'n effeithio ar ferched ar hyd eu hoes.
3. Cyflyrau prin a chyflyrau y mae stigma yn eu cylch - Taflu goleuni ar gyflyrau sy'n cael eu hanwybyddu a'u stigmateiddio ac sy'n effeithio'n anghymesur ar ferched.
4. Cymunedau sy'n cael eu Tanwasanaethu - Mynd i'r afael â gwahaniaethau a rhwystrau i fynediad at ofal iechyd mewn poblogaethau sydd wedi’u hymyleiddio.
I gael rhagor o wybodaeth am y cyhoeddiad hwn, ewch i Ymchwil Iechyd a Gofal Cymru.